Хуваагдсан зүрх. Валентины өдөр 15 жилийн дараа (Өгүүллэг)

5:44 PM


Валентины өдөр болоод өнгөрлөө. Миний хувьд хайртай хүнээсээ хол жаахан уйтгартай Валентин боллоо. Бэлэг ч авсангүй. Хэхэхэ. Та бүхэндээ нэгэн шинэ өгүүллэгээ хүргүүлж байна. Эхний хувилбар буюу "Шархалсан зүрх. Анхны Валентин" гэдэг богино өгүүллэгээ нэлээн дээр үед бичиж байсан юм. Дараа блогтоо оруулнаа. Харин уншигчиддаа дахин сануулахад энэ зүгээр л хийсвэр зохиол миний амьдралтай ямар ч хамаагүй шүү. Хэхэхэ. Байнга сануулдаг уу. Аймаар хаширсан хүн шиг. Яагаад гэхээр заримдаа бүр ойр дотны найзууд маань хүртэл миний бичсэн уран сайхны аргаар хийсвэрлэсэн зүйлийг чи тэгж бодоод тэгсэн үү гээд ямар нэгэн байдлаар надтай холбох гээд байдаг юм. Хэхэхэ. Бүгдээрэнд нь Гэгээн хайрын Валетины өдрийн мэнд хүргэе. 


Хуваагдсан зүрх. Валентины өдөр 15 жилийн дараа (Өгүүллэг)


Өнөөдөр Валентины өдөр. Дурлалт хосын баярын өдөр. Гадаа хаврын урь орж нар ээн цас хайлмагтаж эхэлжээ. Амралтын өдөр болоод ч тэрүү хэдий баярын өдөр ч гудамжинд хөл хөдөлгөөн багатай. Нэлээн өндөр орон сууцны шинэхэн байрнаас залуухан гуалиг бүсгүй гарч зам дагуу аажуухан алхална. Тэрээр гуалиг биед нь яв цав таарсан бэлхүүсээрээ бариу богиновтор шаргал пальто өмсөж өнгө хосолсон зузаан ноолууран ороолт мөрөн дээгүүрээ ороосон нь тун дэгжин харагдана. Бүсгүйн царай туйлын тайван дөлгөөн. Урт хар үс нь дал мөрийг нь бүрхэн намирна. Саруул хөл хөдөлгөөн бага байгаа амралтын өдөр ойролцоох үйлчилгээний төв үрүү алхдаг зангаараа зугуухан тун ч яарамгүй алхана. Үйлчилгээний төвөөр оруут өнөөдөр Валентины өдөр гэх шиг яг үүдэнд нь зүрхэн хэлбэртэй шоколад тэргүүтэн өрсөн бяцхан яармаг худалдаа түүний нүдэнд өртөв. Хэдийнээс Валентиныг нэг их тоож хөл хөөр болдоггүй ч Саруул зүрхэн хэлбэртэй гоёмсог шоколаднаас худалдан авмаар санагдав. Худалдагч бүсгүйд тэр гоёмсог бельги шоколад руу гар зангангаа “Энэ шоколаднаасаа хоёрыг” гэж хэлэх гэсэнээ гэнэт хэлээ хазаад “Нэгийг” гэж хэллээ. Зүрхээ 2 хүнд өгч болохгүй болохоор хоёрыг авч төвдсөнгүй. За юун ч сүртэй юм. Бүр шоколад зориулж авах хүн байхгүй байвал бүр ч эмгэнэлтэй бусуу гэж бодсоноо төдхөн царайд нь мишээл тодров. Харин түүнд зүрхэн хэлбэртэй шоколад зүрхээ биш юмаа гэхэд зүгээр л ёсыг бодож өгч болохоор бүр хоёрын хоёр хүн байдаг. Сайхан хэрэг биш гэж үү. Нэг нь даанч харамсалтай нь нөгөө шоколадыг нь яалтай ч билээ. Тэрээр эхнэртэй. Тэрний оронд шил шарз эсвэл дарс авсан нь дээр юм. Ер нь нэгийг авсан нь болжээ гэж Саруул дотроо бодоод инээд нь хүрлээ. Шоколадаа боолгож аваад Саруул гоо сайханы салон орж тухлахаар шийдэв. Орой Баттай мэдээж уулзахгүй. Тэр эхнэртээ Валентиныхаа бэлгийг өгнө биз. Итгэл бол харин боон романтик ширээ бэлдчихсэн хүлээж байгаа нь дамжиггүй. Орой болтол өөрийгөө сайхан амраая байз гэж Саруул бодов. Түүний байнга зочилдог салон эндээс жаахан зайтай боловч Саруул нар ээсэн дулаахан сайхан өдөр алхах нь тун таатай санагдсан тул тийш мөн л алхахаар шийдэв. Хэдийгээр 2 дугаар сар дөнгөж дундаа орж буй ч энэ жил хавар эрт иржээ. Тэрээр цэвэр агаараар цээж тэнийн амьсгалан нүүрэндээ үл ялиг мишээл тодруулан аажуухан алхаж байлаа. Харц нь харин 15 жилийн өмнөх гэнэн хонгор охин Саруулаас тэс ондоо. Өнгөц харсан хүнд тунч баяр хөөртэй гуниг гутралгүй мэт харагдах боловч сэтгэлийн гүнд нь нэг л тааж боломгүй зүйл нуугдана. Ер нь одоо түүний харцыг тааж уншиж боломгүй мэт. Тийм дээ ч энэ үл ялиг мишээл тодорсон ихэмсэг ч юм шиг жоготой нүдний харцыг нь тайлж унших эр олдоогүй болоод л тэрээр өдий 30 гарталаа ганц бие яваа ч юм билүү. Түүний энэ жоготой нууцлаг харцны өмнө сөхөрч унасан эрчүүд харин цөөнгүй билээ.
Энэ Валентины өдөр гэж үхсэн ламын өдөртэйгээ таарсан гунигтай өдөр шүү гэж Саруул дотроо бодов. Тэртээ 15 жилийн өмнө анх Зоригт зүрхээ өгчихөөд л сэтгэл догдлон түүний утасдахыг хүлээн бүхэл оройжин нулимсанаа урсган суусан билээ. Тиймээ Зориг хэдий маргааш нь утасдан уучлалт гуйж гэрээс гарах аргагүй хүнд ханиад тусан хэвтэж байсанаа хэлсэн боловч зүрхэнд нь гүн шарх үлдээсэн тэр Валентины өдөр харин үнэн байсан. Саруул хэдий царай зүс эзэмшсэн мэргэжил гээд Зоригт гологдохооргүй бүсгүй байсан ч ирээдүйн амьдралаа тэс өөрөөр төсөөлдөг амбицтай Зориг түүнийг царай муутай ч хуучин цагт сайд байсан одоо ч хөл алдаагүй бизнесийн салбарт хүч үзэж буй баян айлын охиноор сольж дөнгөсөн. Харин Саруул гэнэн хонгор харцаа хэн ч уншиж дөнгөхгүй битүүлэг жоготой харцаар сольж орхисонсон. Тэр цагаас хойш түүнийг эргүүлж хоргоох эрчүүд олон байхын хирээр гологдож явсан түүхээ бодохоор эрчүүдийг өөрийнхөө зугаа гаргагч мэтээр төсөөлдөг болжээ. Харин сүүлийн үед тэр Зоригийн аль тэртээ 15 жилийн өмнө хийсэн тэр сонголтод талархах болсон. Учир юун гэвээс хэдэн жилийн өмнө санамсаргүй тааралдсан Зориг утсыг нь авч. Тэгээд утсаар залгаж нэлээн олон хоног уулзаж учирья гэж гуйгаад салахгүй бүр нэг өдөр ажлынх нь гадаа машинтайгаа хүлээж байхад нь аргагүйдэж уулзсан. Тэрээр түүний залуухан сайхан хэвээр байгааг амаа мэдэхгүй магтана. Өөрийг нь аль хэдэн жилийн өмнөх гэнэн хонгор охин мэтээр төлөөлж худал сайхан үлгэрээр дахин хуурах гэж Зориг нэг хэсэг л улайран зүтгэсэн. Үлгэр дуусдаг гэдгийг тэр мэддэггүй бололтой. Саруул харин түүний зохиох дуртай сайхан үлгэрүүдэд томоос том хар цэг аль тэртээд зүрхэндээ тавьж орхисон билээ. Зоригийн ам давхцуулан ярих зохиох дуртай үлгэрүүдийг Саруул тэсвэртэй нь аргагүй сонсож байгаад эцэст нь тэсэхээ байж гэнэт тас тас хөхөрч орхисон. Нулимсаа гартал шоолон тас тас инээх Саруулыг Зориг хараад түүнийг хэдий овор зүс нь хэвээр боловч ухаан бодол нь 15 жилийн өмнөх Саруул биш болжээ гэж сая л нэг юм ойлгожээ. Зориг ч тэгсгээд хоргоож шалгаах нь гайгүй болсон. Тэр цагаас хойш Саруул Зоригтой хотын аль тансаг гоё гэсэн бар цэнгээний газраар голдуу тааралдах болж. Одоо бол тэр 2 эртний танилын ёсоор мэндийн зөрүүтэй л явдаг болсон. Харин дөнгөж 20 шүргэж буй царайлаг ганган охидоор байнга хүрээлүүлж явах Зоригийг нөгөө сайдын охин эхнэр нь гэртээ Саруул тэр нэгэн Валентины үдэш түүнийг хүлээсэн шиг нулимсаа залгин шөнөжин хүлээдэг байх даа. Саруул харин ганцхан орой хүлээсэн. Эхнэр нь харин 15 жил бараг өдөр бүр түүнийг хүлээсэн байж таарна. Тэр золгүй эхнэр Саруул байж болох байсаан. Харин бурханы аварлаар түүнд ийм уй гашуутай амьдрал ноогдоогүй нь аз. Тэр цагаас хойш Саруул түүний эхнэр болоогүй нь миний азгүйнх биш харин азтайнх юм байна гэж бодох болсон. Энэ бодол нь Зоригийн эхнэртэй тааралдсан цагаас хойш бүр батажжээ. Өөрөөс нь бараг үе мултарсан эгч юм шиг овортой харагдах үнэтэй боловч нэг л таарамж зохицол муутай хувцасласан хамгийн гол нь нүд нь гунигаар дүүрэн тэр эмэгтэйг хараад Саруул эмэгтэй хүний хувьд түүнийг өрөвдөж билээ. Тэр нэгэн золгүй Валентины өдрөөс хойш Саруул их өөрчлөгдсөн. Тийм ээ амьдрал надад хайртай би ч амьдралд хайртай. Тэрээр өөрийгөө цаг ямагт завгүй байлгаж Зоригт гомдсон гомдол, шаналал, шархалсан зүрхээ ажил бас өөрийгөө хөгжүүлэх урт удаан хугацааны зорилготой аянд зарцуулсаан. Гадаадад дээд сургууль төгсөж мэргэжлээрээ эмэгтэй хүний хийж чадах боломжийн хирээр кареер хийж эхэлсэн. Азаар аав ээж нь бас бурхан түүнд сийрэг ухаан хайрласан. Одоо Саруул хотын хамгийн цэнгэг агаартай газарт хамгийн люкс гэгдэх орон сууцанд өөрийн стиль имижээр тохижуулсан тун чиг дэгжин орчин бүрдүүлсэн тансаг гэртэй. Бүр том орд харш биш ч ганц бие бүсгүй хүнд бол боломжийн сайхан диваажин. Саруул гэрээ миний диваажин гэж дуудах дуртай. Тийм ээ мэдрэмж сайтай бүсгүйн хувиар жирийн нэгэн 4 өрөө байр нь орж очсон хэн ч уулга алдах саруулхан сайхан диваажин болсон. Бас тэрээр Монголдоо тэргүүлэх компанид нэлээн эрх мэдэл бүхий захирлын ажлыг хийх болсон. Хэргийн учир зөвхөн захирал болсондоо ч биш, Саруул хамгийн гол нь энэ ажилдаа дур сонирхолтой. Хийж бүтээж чадаж буй зүйлээрээ бахархаж явдаг эмэгтэй. Өнөөдрийн энэ амгалан тайван амьдралд хүрэхэд урт удаан хугацаа өнгөрсөн ч Саруул энэ бүгдийг өөрийн гараар бүтээсэн болохоор тэрээр өөрийн гэсэн юм бүхэндээ хайртай. Бүр дэндүү их хайртай. Хэн нэгэн баян эрийн эхнэр болж үнэтэй харшид заларч үнэтэй машин унах тансаг амьдралаас ч илүү хайртай. Эзэн хичээвэл заяа хичээнэ. Саруул хичээсэн шиг заяа нь бас хичээсэн. Харин энэ бүхний золиосонд гэнэн хонгор харц, хүнд итгэх итгэл хоёроо л өгчихсөн билээ. Тэр нэгэн Валентинаас хойш Саруул нэг ч Валентиныг тэмдэглээгүй. Тэмдэглэе гэсэн хүн байхгүйдээ ч биш зүгээр л тэр гашуун түүхийг дандаа санагдуулдаг Валентиныг тэрээр үзэн ядсандаа ч юм уу огт тэмдэглэдэггүй байсан. Харин өнөөдөр гэнэт юу болсон юм мэдэхгүй хэн нэгэнд улаан хайрцагтай зүрхэн хэлбэртэй шоколад өгмөөр бүр өгөх өгөхдөө хоёрын хоёр хүнд өгмөөр санагдаж.
Гоо сайханы салонд иллэг хийлгэн амарч авсан Саруул гэртээ ирээд кофе чанагчдаа анхилуун сайхан үнэртэй кофе чанаад буйдан дээр суун тухлав. Телевизороор дүүрэн Валентиныг манайд угт, манайд ир хосуудаа гэсэн урилга заллага зар сурталчилгаа. Кино үзэх гэхээр бөөн утгатай утгагүй хайрын кино. Үзэх ч юм олдсонгүй тул зурагтаа бүр унтрааж орхив. Валентин угаасаа ганц бие хүмүүст дарамт учруулдаг баяр. Ядахдаа л арай энэ жил хайрын бурхантайгаа учрах юм биш биз, хэн нэгэн надад хайраа илчлэх юм биш биз гэсэн битүүхэн горьдлого зүрхэндээ зурсхийлгэдэггүй ганц бие хүн тэр дотороо бүсгүй хүн байдаг гэж үү. За тэгээд илчиллээ гэхэд хэрэв таалагдахгүй хүн байвал Хн очиж очиж энүүгээр л би дутаж гэнэ. Эсвэл энэ яах гэж надад баяр хүргэв ч гэдэг юмуу элдвийн юм бодогдуулж амгалан тайван байдал алдагдуулж орхидог юм.
Цаг нэлээн орой болсон тул гоёлын ширээнийхээ өмнө толинд харж суугаад Саруул нүүр нүдээ гоодож эхлэв. Царай зүс нь он цагийн нугачаанд бүдгэрч гундаагүй нь түүнд бурханаас заяасан бас нэг бэлэг гэлтэй. Гялалзсан булбарай арьс, урт сормуустай хархан нүд, гоо сайхан царай нь өөрийгөө хайрладаг эзний ачаар нэг их өөрчлөгдөөгүй ч харин тэртээ 15 жилийн өмнөх шиг зүрх нь булиглахгүй. За Батаа ч маргааш л нэг оройн хоолонд урина биз. Эхнэрээсээ айгаад өнөөдөр аягүй бол баяр ч хүргэхгүй дээ. Итгэл харин бэл муутай хэдий ч хирэндээ л тансаг газар захиалчихсан суугаа. Өөр хүнгүйг нь бодохоор түүнтэй суумаар ч шиг. Даан ч тэр бодож сэтгэж байгаа нь яг л балчир хүүхэд шиг. Насаараа ямар тийм хүнд ээж шиг нь зааж сургаж амьдралтай ч биш дээ. Ганц авах юм нь тэр орондоо ч харин нэг залуу хүн гэсэндээ гал халуун шүү. Батаа бол намбатай халамжтай бас ухаантай. Эхнэр нь байхгүй үед Саруулыг өөрийн гараар хийсэн тун чиг амттай сайхан хоолоор дайлна. Батаатай элдвийн сонин сайхан зүйл ярьж хөөрч үзэл бодлоо хуваалцаж суухад урамтай. Зарим үед Саруул түүнийг өөрийн ажил хэрэг дээрээ үнэгүй зөвлөгч болгочихдог тал ч бий. Оюун ухааны хувьд нэлээн боловсорсон юм үзэж нүд тайлсан тэрээр Саруулын тархины цангааг гаргадаг ганц хүн гэлтэй. Болдогсон бол энэ 2 хүнийг нийлүүлээд нэг сайхан төгс эр хүн бүтээхсэн. Өрийн энэ саваагүй бодолдоо инээд нь хүрч тэрээр ганцаараа чангаар инээж орхив.
Утас нь Дрррррр гэж дуудах чимээнээр буйдан дээр хаясан утсаа шүүрч авбал Батаа шивэгнэх шахам –Баярын мэнд. Найз нь өнөөдөр завгүй шүү. Ойлгоорой, маргааш уулзъя. Саруулыг ам нээж амжаа ч үгүй байтал утас тас. Дийд дийд дийд. Аягүй бол эхнэрээсээ нуугдаж угаалгын өрөөндөө орох зуур залгасан биз.
Гоодож дуусаад Саруул зугуухан хувцасаа сольж өмсөв. Хувцасны шүүгээнээсээ саяхан шинээр худалдаж авсан хүрэн даашинзаа гаргаж өмсөв. Хилэн хүрэн даашинз гоолиг биеийг нь барьж тэрээр тун дэгжин сайхан харагдана. Одоо Саруул Валентины үдэшт бүр бэлэн болчихов.
Утас нь дахиад Дрррррррррррррр. Байна уу. Энэ удаад Итгэл цовоо хөгжилтэй дуугаар Хайраа, хайр нь ингээд очоод авъя Чи бэлэн үү? Саруул Бэлэн бэлэн. Хүрээд ир гэж хариулаад, Хайраа хайр нь гэнэ шүү “Хайр” гэдэг үгийг мөн ч хайр гамгүй хаа хамаагүй хэлдэг хүн шүү гэж бодов.
Саруул гэрээсээ гарахын өмнө толинд өөрийгөө харвал урьдаас нь танихгүй хүүхэн ширтэж байх шиг. Харц нь харин нэг л тоомжиргүй бөгөөд ойлгомжгүй. Баяр баясгалантай ч учир битүүлэг тунарсан жоготой харцтай бүсгүй өөдөөс нь ширтэн байх аж.

Б.Эрхэмбаяр
2011 оны 2 дугаар сарын 14.

Та бас дараахь нийтлэлүүд сонирхоорой:

5 сэтгэгдэл